Desidido nga magpasaka sang kaso ang iloy sang Person With Disability (PWD) nga gin-alegar nga ginhimuslan sang Brgy. Tanod sa Brgy. San Pedro, Molo, Iloilo City sang Nobyembre 18 sang kaagahon.
Ang biktima amo si alyas Inday, 28, kag may problema sa paminsaron.
Samtang, ang suspek amo si Alyas Topel, 48, kag isa ka Brgy. Tanod sang nasambit nga lugar.
Sa interview sang Bombo Radyo sa iloy ni Alyas Inday ginpahayag sini nga ipapreso gid niya ang suspek sa ginpahayag nga paghimulos sa iya nga bata.
Suno sa iya, natulugan ini siya sang tion nga nadula ang iya anak nga si Inday kag ginpangita man ini gilayon sang iya nga stepfather apang wala ini nakita.
Pagkatapos sang isa ka oras nagpauli ini nga may mga lutak kag didto nagduda ang iya iloy.
Una nga nagpamalibad si alyas Inday nga ginhimuslan ini, apang sa ulihi nagtuad ini sa iya iloy kun sa diin ginatudlo nga suspek amo ang isa ka Brgy. Tanod.
Nahibaluan nga gindala ini sang suspek sa cr sang daan nga brgy. hall sang San Pedro, Molo kag didto natabo ang pa panghimulos.
Sa pihak nga bahin, natigayon man nga nakuhaan sang pahayag ang Punong Barangay sang amo nga lugar nga si Karl John Lapascua angot sa natabo nga paghimulos sang isa niya ka opisyal sa barangay.
Suno sa iya, wala sini gina-tolerate ang amo nga pinamatasan sa diin tuman na ka eskandaluso sa kadam-an.
Pahayag pa niya, ginhingyo sini ang pamilya sang PWD nga bata nga magpaidalom sa Medico-legal agud nga may yara sang basehan kun ano gid man ang natabo.
Sa subong ginahikot na sang iloy ang mga papeles agud nga maka-file na sang kaso batok kay Alyas Topel nga amo ang suspek sang pagpanghimulos.
