ILOILO CITY- Hugot ang pangamuyo sang pamilya sang Ilonggo seafarer nga sakay sa naglugdang nga Gulf Livestock 1 sa baybayon sang Amami Oshima island sa Japan nga makit-an pa nga buhi ang ila himata.
Sa interview sang Bombo Radyo kay Arly Alcazar, iloy sang 29-anyos nga seaman nga si Darwin Hulk Alcazar sang Lapaz, Iloilo City, iya ginpahayag nga manugduha pa lang ka bulan nga nakabalik sa barko ang iya anak apang lima ka tuig na ini nga nagatrabaho bilang seaman.
Suno sa iloy, antes natabo ang paglugdang sang barko, nakaistoryahanay pa si Darwin kag ang iya asawa apang wala lang ini sang ihibalo kun ano ang ila gin-istoryahan kag kun nakapanugid ini nga malain ang tyempo samtang nagalayag ang barko.
Sa subong suno sa natungdan, nagalaum sila nga makasalbar sa gihapon ang iya anak kag makapauli nga buhi.
Nahibaluan nga sakay sang 11,947-ton Gulf Livestock 1 cargo vessel ang 43 ka mga crew sa diin 39 ang mga pinoy, 2 ang New Zealander kag 2 ang Australian.
Sakay man sang nasambit nga barko ang 5,800 ka mga baka nga naghalin sa New Zealand kag dal-on sa China sa diin kalabanan sa mga ini ang nagabusong pa.
Sa 39 ka Pinoy, duha na ang nakit-an nga survivors samtang isa naman ang patay.
Naghalin sa New Zealand ang barko kag padulong sa China.
