ILOILO CITY – Indi lamang paagi sa pagbasa sang bibliya mapakita ang himpit nga pagtuo sa Ginuo.
Ini ang ginpahayag ni Rev. Father Joenick Territorio, Chancellor sang Archdiocese of Jaro, ilabi na subong nga may yara sang pandemya.
Sa Good Morning Philippines program, ginpahayag ni Fr. Territorio nga madamo sang paagi agud nga mapakita ang himpit nga pagtuo kag pila lamang diri amo ang pagpatigayon sang rosary, devotion kag paghimo sang maayo sa isig ka pareho.
Suno kay Father Territorio, pamilya ang sentro sang relihiyon ilabi na sa Romano Katoliko rason nga mas epektibo kun ang pagtudlo sang doktrina kag katesismo ang naga-umpisa mismo sa balay.
Ginpahayag ni Father Territorio nga ang mga ginikanan ukon guardian ang may daku nga katungdanan sa pagtudlo sang christian values sa kabataan apang ini ang nagakinahanglan sang time management bangud nga ang iban nga ginikanan ang may yara man sang trabaho nga ginakasakuan.
Sa bahin naman sang Simbahang Katolika, may yara sang ginapatigayon nga adjustment kun paano mapalab-ot sa mga deboto ang kaundan sang bibliya.
Ang epektibo nga pagtudlo sang katesismo ang nagakinahanglan sang nagakaigo nga tion kag preparasyon.
Sa subong nga may yara sang pandemya, ginpahayag ni Father Territorio nga mas makapaayo nga hingalitan ang tion agud nga mas mapabaskog pa ang pagsalig sa Ginuo paagi sa himpit nga pagpasalamat kag pagpangamuyo apisar nga kanselado ang mass gatherings.
