ILOILO CITY – Tuman ang kalipay kag pagpasalamat sang pamilya sang Ilonggo nga pari nga hostage sang Maute group sa Marawi City.
Ini kasunod sang pagguwa sang video ni Father Teresito Suganob nga nagapanawagan kay Presidente Rodrigo Duterte nga ikonsidera man ang ila kabuhi.
Sa interview sang Bombo Radyo Iloilo, ginpahayag ni Ramon Suganob, pakaisa ni Fr.
Suganob, nga tungod sa nasambit nga video, nahibaluan nila nga buhi pa ang ila himata matapos ang isa ka semana nga gin-hostage ini sang rebelde nga Maute.
Suno pa kay Ramon, ila lang ginapangamuyo nga hilwayon na ang mga hostages ilabi na si Fr. Suganob.
Nag-apelar man ang pamilya Suganob nga untaton na kuntani ni Presidente Duterte ang giyera bangud kun magpadayon ini, madamo pa nga mga tawo ang mapatay.
Makaluluoy suno kay Ramon ang mga sibilyan nga yara sa Marawi lakip na si Fr. Suganob kun atakihon sang government forces ang Maute group bangud sigurado nga madalahig ang mga ini.
