Pamilya Suganob wala na makibot nga ginatudluan sang Maute nga maghimo bomba si Fr. Suganob

ILOILO CITY – Ginalauman na sang pamilya sang Ilonggo priest nga si Fr. Teresita Suganob sang Lambunao, Iloilo, ang naagyan sini subong sa kamot sang Maute nga hostage sa karon ang pari.
Sa interview sang Bombo Radyo Iloilo, ginpahayag ni Boyet Suganob, utod ni Fr. Teresito, nga wala na sila makibot sang mabatian sa Bombo Radyo nga ang pari ang ginahimo sang Maute nga tagabitbit sang mga armas kag bomba kag ginatudluan ang pari nga maghimo sang bomba.
Suno kay Boyet, wala man sang mahimo ang iya utod kag ang iban pa nga hostages bangud sa pamahog sang mga rebelde nga pugutan ini sang ulo kun indi magsunod sa ginapaubra sang mga militante.
Tubtob sa karon wala pa nakapakig-angot sa ila si Fr. Suganob kag nagakalipay nga mahibaluan nga buhi pa ini.
Ginpahayag ni Boyet nga sa Bombo Radyo lang ang mga ini nagakuha sang impormasyon sa kahimtangan sang iya utod kag apelar sini nga buligan sila nga magpangamuyo para sa kahilwayan ni Fr. Suganob kag iban pa nga hostages.