Wala pa sang may nabatun ang pamilya Villar nga graft kag administrative complaints nga ginpasaka sang Office of the Ombudsman.
Ini ang ginpakigbahin ni former Senate President Manny Villar matapos ang ginpasaka sa iya nga kaso kag sa iya asawa nga si former Senator Cynthia Villar, mga kabataan sini nga sanday Senator Mark Villar, Senator Camille Villar, Manuel Paolo Villar, kag iban mga opisyal sang PrimeWater.
Suno kay Villar, nahibaluan lamang sang ila pamilya nga may ara na sila sang kaso pinaagi sa report sang media.
Apang ginklaro man sang anay senador nga handa sila nga magsunod sa legal nga proseso kag mag-atubang sa mga reklamo sa nagakaigo nga lugar kag tion.
Nagpahayag man ini nga indi pa dapat maghatag sang konklusyon ang publiko subong nga wala pa nabatian sang mga ini ang paathag sang ila partido.
Madumduman nga kahapon nga adlaw, ginkumpirma ni Assistant Ombudsman Mico Clavano ang pagpasaka sang kaso nga yara na subong sa preliminary investigation.
Nahibaluan nga may kaangtanan ang kaso sa nabaton nga report sang Office of the Government Corporate Counsel nga nagasiling nga halin 2015 tubtob 2022, yara sa 75 ka local water districts ang nagsulod sa joint venture agreements sa Prime Water Infrastructure Corporation ukon PWIC nga ginakabig “grossly disadvantageous” ukon makahalit sa mga water district.
