ZAMBOANGA DEL NORTE– Ginlamon sang kalayo ang isa ka pampasahero nga barko sa probinsya sang Zamboanga del Norte.
Nahibaluan nga gulpi lang nga nagkalayo ang MV Lite Shipping nga isa ka Ro-Ro vessel nga malapit na kun tani sa dungkaan sang Dapitan City.
Suno kay Fred Castro isa ka journalist kag isa man ka survivor, naglumpat ang mga pasahero sa barko bangud sa tuman ka dako nga kalayo nga naga lamon sa barko kag bangud man sa nerbiyos kag panic.
Suno pa gid kay Castro, alas -onse sang gab-i sang nagluntad ang sunog samtang nagakatulog ang tanan nga mga pasahero.
Nakibot nalang sila sang nabatian nila ang alarma sang barko nga nagakalayo na ang parte sini.
Dugang pa ni Castro nadugayan pa bag-o sila na rescue sang isa ka fast craft nga na tiyempuhan nga nag agi lang.
Ang nasambit nga barko ang naghalin pa sa Samboan, Cebu City kag padulong kun tani sa Dapitan City.
Sa subong nag lab-ot na sa masobra 100 ka mga pasahero ang na rescue samtang 37 pa ang missing.
Padayon naman ang ginapatigayon nga rescue operation sang Philippine Coastguard, Philippine National Police-Maritime kag iban pa nga mga otoridad sa nasambit nga probinsya sa pasahero nga naglumpat sa barko.
Suno sa Philippine Coast Guard-Zamboanga Del Norte, 137 ang sakay sang barko kag 109 diri ang mga adults, 24 ang mga kabataan samtang apat naman ang mga infants.
