ILOILO CITY – Nagdepensa ang pamunu-an sang The Medical City – Iloilo may kaangtanan sa isa ka pasyente nga naadmit sa nasambit nga hospityal nga nagpositibo sa Reverse Transcription Polymerase Chain Reaction (RT-PCR) test apang una na nga nagnegatibo sa Rapid test.
Sa interview sang Bombo Radyo kay Dr. Felix Ray Villa, Chief Executive Officer sang The Medical City – Iloilo, iya ginpahayag nga ang pasyente ang ginbawi-an sang kabuhi bangud sa bacterial infection kag metastatic cancer kag indi sa Coronavirus Disease 2019 (COVID-19).
Sa pagpaathag ni Dr.Villa, sa ginpatigayon nga Raid test, nagpositibo sa IgG apang nagnegatibo naman sa IgM ang pasyente nga nagakahulugan nga wala sang active COVID-19 disease ang natungdan.
Apisar sini, nagpositibo ang resulta sang RT-PCR test bangud nga natumod nga may yara sang COVID viral RNA sa pasyente apang indi lang matumod sang confirmatory test kun ini ang live ukon dead virus.
Gin-athag ni Dr. Villa nga apisar nga wala nalakip sa COVID-19 patient ang pasyente apang wala ini ginsimpon sa non-COVID patients sa nasambit nga hospital.
Isa ka semana matapos naadmit sa hospital, ginbawi-an na sang kabuhi ang pasyente apang ginpasuguro sang natungdan nga ginsunod sang tanan nga medical staff ang protocol agud nga malimitahan ang paglaton sang balati-an.
Kadungan sini, regular man ang ginapatigayon nga test sa mga medical staff bilang kabahin sang precautionary measures.
