ILOILO CITY–Gina abi-abi sang pamunu-an sang University of San Agustin sa General Luna Street Iloilo City ang pagkadakop sa suspek sa asud-asud nga bomb threat sa syudad.
Sa interview sang Bombo Radyo kay Fr. Williener Jack Luna, Director sang Philantropic, External ang Alumni Relations (PEAR) sang nasambit nga unibersidad, iya ginpahayag nga ginkalipay niya ang pagkadakop sa suspek nga si alyas Vic, 28 anyos kag ginapahayag may deprensya sa panghuna-huna.
Suno kay Fr. Luna nga naka-istoryahanay sila kag gin-ako sang suspek ang tuhoy sa asud-asud nga bomb threat.
Sa pihak sang pagpangayo sang pasaylo ni Alyas Vic, ginpahayag ni Fr. Luna nga magapasaka sang kaso ang pamunu-an sang unibersidad batok sa suspek.
Samtang, gin-athag sang Iloilo City Police Office (ICPO) nga isa lang ang suspek sa asud-asud nga bomb threat.
Sa interview sang Bombo Radyo kay ICPO Director Police Senior Superintendent Martin Defensor Sr., iya ginpahayag nga isa lang ang suspek sa pagpadala sang bomb threat sa nasambit nga unibersidad.
Sa pagkamatuod suno kay Defensor, iya na nga ginhatag sa Cybercrime Group ang laptop ni Alyas Vic agud ma-trace ang IP address kag ma-retrieve ang gin deactivate na nga bogus facebook account.
Magluwas diri, hibaluon man suno kay Defensor ang iban pa gid nga mga files nga nakatago sa laptop sang suspek.
Apisar may deperensya sa panghunahuna , desidido ang ICPO nga pasakaan sang nagakaigo nga kaso ang 28 anyos nga suspek.
Mahimo suno kay Defensor nga may Neurological disorder si alyas Vic apang mataas ang iya intellectual quotient (IQ) rason nga makahibalo siya nga maggamit sang Facebook.
Depensa naman ni Alyas Vic, indi siya ang sa likod sang bomb threat nga ginpadala ni Felix Tan sa Facebook page sang nasambit nga unibersidad.
Sa pagpaathag ni Alyas Vic, iya lamang nga ginsunod ang ginhimu ni Felix Tan paagi sa paghimu sang bogus account nga Abdal Malek Al Ahdal.
Kadungan sang pag-ako, nagpangayo sang pasaylo si Alyas Vic sa tanan nga nahul-an kag ginopasalig nga indi na magliwat pa.