Nagpanugyan ang National Police Commission (NAPOLCOM) nga nagakadapat unahon ang kabuhi sang biktima sa tion nga may magluntad nga krimen.
Sa interview sang Bombo Radyo kay Atty. Joseph Celis, director sang NAPOLCOM Region 6, iya ginpahayag nga importante nga salbaron anay ang kabuhi sang mga nasamaran sa isa ka krimen kag indi na paghulaton pa ang mga otoridad ilabi na kun nagakinahanglan ini sang gilayon nga pagbulong.
Magluwas diri, nagakadapat nga ligwahan ang lugar sa diin natabo ang insidente agud mangin mahapos ang pagkuha sang mga ebidensya.
Suno kay Celis, importante man nga mapahamtangan man sang tape ang bug-os nga parameter sa diin nagluntad ang krimen.
Yari naman ang dugang nga mga proseso nga dapat ubrahon sang crime investigator sa isa ka crime scene:
- Magtipon sang dako nga ebidensya;
- Magkuha sang mga pictures sa crime scene;
- Kolektahon ang proseso sang insidente lakip na ang documentation;
- Magpatigayon sang Secondary Survey; kag
- Maggamit sang inventory log sa diin narekord ang tanan nga ebidensya
Samtang, gin-athag man ni Celis nga mahimo magpatigayon sang citizen’s arrest ang isa ka private citizen – isa ka persona nga wala nagsumpa bilang law-enforcement official.
Ini ang mahimo patigayunon sa tion nga ang isa ka persona ang mahimo pa lang sang krimen ukon nakahimo na sang krimen sa ‘reasonable period’ sang tyempo.
