Nagahulat na lamang ang Police Regional Office (PRO) VI sa resulta sang imbestigasyon may kaangtanan sa isa ka pulis nga nadakpan nga iligal nga nagbulang sa isa ka subdivision sa Brgy. Cagbang, Oton, Iloilo kag nagtrending matapos nakuhaan sang video nga nagadalagan sa kahon sang talamnan.
Ang pulis amo si Police Corporal Virgilio Rojo Jr., residente sang amo nga barangay, kag assigned sa General Services Office (GSO) sang Iloilo City Police Office (ICPO).
Sa interview sang Bombo Radyo kay Police Brigadier General Rolando Miranda, iya ginpahayag nga ang tanan nga nagapakigbahin sa iligal nga sugal ukon pabulang, ang nagakadapat hatagan sang nagakaigo nga penalidad.
Suno kay Miranda, ginahulat na lamang niya ang mangin resulta sang imbestigasyon kag rekomendasyon sang Regional Internal Affairs Service 6 (RIAS-6) angot sa kaso ni Rojo agud makahimo sang desisyon batok sa pulis.
Magluwas kay Rojo, gin-ako ni Miranda nga may yara naman siya sang pulis nga una na ginkasuhan bangud man sa pagpakigbahin sa iligal nga pabulang.
