GUIMARAS– Gina abi-abi sang Guimaras Provincial Government ang desisyon sang Inter-Agency Task Force nga ipaidalom sa Modified General Community Quarantine ang nasambit nga probinsya.
Sa interview sang Bombo Radyo kay Vice Governor John Edward Gando, iya ginpahayag nga maayo ini nga balita para sa mga Guimarasnon.
Suno kay Gando, paga-istoryahan nila nga mga opisyal ang mga dapat ipatuman sa idalom sang Modified General Community Quarantine kun sa diin kinahanglan nga magasanto ini sa pagsulundan sang task force.
Ginpahayag ni Gando nga magapabilin naman ang inter-zonal movement sa diin limitado lang sa mga essential ang pagbyahe.
Amat-amatun man ang pagbukas sang turismo sa diin 50% lang sang kabug-usan nga kapasidad ang pahanugutan kag kun backriders sa motorsiklo ang pagahambalan, pagasundon sa subong ang mandu sang Land Transportation Office.
Sa bahin naman sang ginaduso nga One Panay, ginpahayag sang Bise Gobernador nga kun siya lang ang pamangkuton, pabor siya nga may yara sang isa lang ka order sa Western Visayas agud mas mangin organisado kag isa lang ang direksyon kag panan-awan sang tanan.
Sa bahin naman sang gina-alegar mga katapo sang isa ka pamilya nga nagpauli gamit ang private plane, ginpahayag ni Gando nga nagpadala sang sulat ang pamilya kanday Guimaras Governor Samuel Gumarin, Iloilo Governor Arthur Defensor Jr. kag Iloilo City Mayor Jerry Treñas agud pahibaluon nga sila ang magapauli.
Ginpasugtan man ni Governor Defensor kag ni Mayor Treñas ang pagpauli sang pamilya kag ulihi diri nga nagpasugot amo si Governor Gumarin.
Suno kay Gando, pag-abot sang pamilya sa airport, pagasugaton sila sang ambulansya kag ideretso sa Guimaras agud i-quarantine.
Negatibo sa Reverse Transcription – Polymerase Chain Reaction Test ang tanan nga miyembro sang nasambit nga pamilya.
