ILOILO CITY – Nagaplano ang pamunuan sang Sangguniang Panlungsod sa Iloilo nga magpagwa sang Memorandum of Final Warning batuk sa anuman nga disorderly bahavior nga matabo sa konseho.
Ini ang kasunod sang natabo nga tensyon sa session sang Iloilo City Council sa sulod sang duha ka semana.
Sang nagligad nga semana, diyutayan lang nga sumbagon ni Councilor Plaridel Nava si Councilor Rex Sarabia bangud nga wala nauyunan ni Nava ang suno sa iya pagkutaw-kutaw ni Sarabia nga nagakaon sang popcorn.
Kahapon, ginsaruso ni Nava si Councilor Sedfrey Cabaluna matapos nga gintawag niya ini nga “Manong Nava”.
Sa interview sang Bombo Radyo kay Councilor Rudolph Jeffrey Ganzon, acting presiding officer sa Sangguniang Panlungsod, iya ginpahayag nga sa tion nga magbalik si Vice Mayor Jeffrey Ganzon, magapagwa ini sang memorandum of final warning indi lang sa mga konsehal nga na-involve sa tension kundi, mangin sa tanan nga nagatambong sa session sang konseho.
Suno kay Ganzon, ini ang magaserbe nga pahanumdom sa tanan.
Sa tion nga may yara sang sin-o man nga magtuga sang tension, mahimo sila nga ma-contempt sang presiding officer ukon ma-reprimand.
Sa bahin naman sang mga konsehal, ginpahayag ni Ganzon nga ginapahanugutan man nga magplastar sang opinyon ang tanan nga bahin.
