ILOILO CITY– Plano sang pamunuan sang West Visayas State University nga magpahulam sang mga tablets sa mga college undergraduate students, agud mapadayun sang mga ini ang ila pagtuon apisar may yara sang pandemya.
Sa interview sang Bombo Radyo kay Dr. Joselito Villaruz, Presidente sang West Visayas State University, iya ginpahayag nga sa tagsa ka mga tablets, naka upload ukon naka store ang mga learning materials nga ila magamit.
Suno kay Villaruz, magasugod ang pagpahulam sang amo nga gadgets sa tagsa ka estudyante sa tion nga matapos ang uploading sang learning modules kag antes paman magsugod ang klase sa Setyembre 07, 2020, samtang ang pagbalik naman sang tablets ang pagahimuon pagkatapos sang semester.
Ginpahayag ni Villaruz nga may yara man sila sang nagkalain-lain nga strategies agud mamonitor ang pagtuon sang kabataan, lakip na ang pagsabat sa mga exercises nga igahatag sa ila.
Dugang pa niya, may yara man sang shared responsibility ang mga estudyante sa paghalong sang mga gadgets nga ginpahulam sa ila sa diin, kun intensyunal ini nga naguba, paga-islan ini sang estudyante.
Gin-athag man sang natungdan nga sa subong na semester, bangud sa kakulang sang resources, ang estudyante lang sang main campus ang mahatagan sang tablets, kag mahimo nga sa madasun nga semester, makahatag na sila sa mga external campuses sang WVSU.
