Padayon ang panawagan sang ‘accountability’ sa mga responsable sa palpak nga proyekto sang Aganan Flyover kag Ungka Flyover sa Pavia, Iloilo, nga tubtob subong ginakabig sang pumuluyo nga isa ka daku nga kapaltahan sa pagpatuman sang imprastruktura.
Sa interview sang Bombo Radyo kay Pyt Trimañez, anay miyembro sang Sangguniang Bayan sang Pavia, ginpahayag niya nga aktibo na siya sang una pa sa pagpanawagan sang hustisya para sa mga apektado sang proyekto.
Nadumduman niya nga sang Mayo 31, 2023 sang nagkadto siya mismo sa Senado kag personal nga ginhatag ang restitution sa 11 ka senador.
Apang suno sa iya, wala gid natuman ang ginpasalig ni Senator Bong Revilla nga matinguhaan nga maimbestigaran ang isyu antes matapos ang termino si Senator Revilla bilang chairman sang committee sa Public Works.
Ginpabutyag pa ni Trimañez nga indi lang isa kundi madamo pa gid nga resolution ang napadala sa House of Representatives, apang wala pa sang klaro nga sabat ukon solusyon halin sa mga opisyal.
Ginpahayag niya nga pwerti na gid ang sakripisyo sang pumuluyo, ilabi na sa problema sang traffic nga ginadala sang palpak nga flyover.
Suno pa sa iya, ini nga sitwasyon ginakabig nga economic sabotage, pareho sang ginpahayag ni Presidente Ferdinand Marcos Jr., bangud madamo na gid sang nawad-an sang negosyo kag palangabuhian nga naapektuhan.
Gindugang pa ni Trimañez nga kabay pa nga ini nga mga hitabo mangin leksyon sa tanan, kag magkahadlok na ang mga opisyal nga nainvolve sa maanomaliya nga proyekto.
Gintuad man niya nga kahuluya gid kun isa ka ka parte sang proyekto nga pareho sang flood control scandal, nga tubtob subong ginakabig nga simbolo sang kapalpakan sa serbisyo publiko.
Padayon ang iya panawagan nga dapat may mangin accountable, kag indi lang ini tapuson sa kasulatan kundi sa aktwal nga tikang para sa kaayuhan sang pumuluyo.
