ILOILO – Ginplastar sang Ilonggo nga mamalidha ang iya mga ginalauman nga ipatpat ni President Ferdinand R. Marcos Jr. sa iya ikatatlo nga State of the Nation Address (SONA).
Sa interview sang Bombo Radyo kay Iloilo 2nd District Rep. Michael Gorriceta, iya ginpahayag nga lakip sa mga ginalauman sini nga iplastar sang presidente sa iya SONA amo ang ikaayong lawas, edukasyon, inflation, turismo, infrastructure, enerhiya kag teknolohiya.
Suno kay Gorriceta, bilang isa ka Ilonggo nga mamalidha, nagalaom ini nga matutukan man sang presidente ang mga kinahanglanon sang Iloilo kaangay sang kakulang sang kuryente kag ang ginalauman nga maumpisahan na ang Panay-Guimaras-Negros Island Bridge.
Ang SONA ang patigayunon sa Lunes, Hulyo 24, las 4:00 sa hapon matapos ang pagbukas sang Second Regular Session sang 19th Congress sa diin maga-convene ang Senado kag House of Representatives.
Ini ang patigayunon sa Plenary Hall sang Batasang Pambansa sa Quezon City.
