ILOILO – Indi pa maathag sa imbestigayon sang mga pulis kun ano kadaku ang salabton sang tatlo ka miyembro sang militar nga yara sa likod sa pagluthang-patay sa isa ka jail warden sa Bangga Dama, Brgy. Bolong Oeste, Sta. Barbara, Iloilo kasunod sang natabo nga road rage.
Patay sa amo nga shooting incident si Andrew Larupay, 51, residente sang Barangay Caninguan, Lambunao, Iloilo kag nagaserbe nga jail warden sa La Carlota City Jail sa Negros Occidental.
Una nga nadakpan sa ginpatigayon nga hot pursuit operation si Private First Class Bjourn Kirby Esposo, 26, residente sang Barangay Malitbog Ilaya, Bingawan, Iloilo kag assigned sa 12th Infantry Battalion sang Philippine Army sa banwa sang Calinog.
Santo sa alegasyon ni Esposo, amo ini ang natabo:
Naghalin sa Camp Carreon sa Barangay Libot, Calinog, Iloilo ang elf truck nga ginasakyan ni Esposo kag sang duha niya ka kaupod nga sanday Staff Sergeant Nelson Sorilla, 40, residente sang Barangay Binangkilan, Santa Barbara; kag Nilo Silao alias Tata, 47, residente sang Magsaysay St., Calinog, Iloilo, miyembro sang Citizen Armed Force Geographical Unit (CAFGU).
Padulong sila sa syudad sang Iloilo agud magbakal sang suplay para sa battalion.
Pag-abot sa national road sa Cabatuan, nagsundanay sila sang kotse nga ginamaneho ni Larupay.
Ginapahayag nga nagpundo si Larupay rason nga nagbusina si Esposo agud nga makauna sa alagyan.
Sunod nga gulpi nga nag-overtake si Larupay, naggulpi-pundo rason nga diutayan lang nga makabunggo ang elf truck nanday Esposo sa kotse nga ginasakyan ni Larupay.
Natabo ang sag-idanay kag ginapahayag nga nagapagwa na si Larupay sang iya nga armas-luthang samtang yara pa lang sila sa dalan.
Ginapahayag man nga nauna si Larupay sa Bangga Dama sa Sta. Barbara kag didto ginhulat ang elf truck nga ginasakyan nanday Esposo.
Ginapahayag nga nagpundo man ang elf truck, kag sunod nga nagpalapit si Larupay sa driver’s seat sang elf truck kag ginhampak si Esposo.
Ginapahayag nga naghingyo si Esposo nga wala lang sang sakitanay apang nagliwat pa gid si Larupay.
Nakit-an ni Esposo nga may armas-luthang si Larupay rason nga nag-una na lang palupok si Esposo rason nga natumba si Larupay malapit sa driver’s seat sa elf truck.
NAGALINAPTA NGA MGA BALA
Sang gin-usisa sang Bombo News Team ang lugar kun sa diin natabo ang shooting incident, nakit-an nga nagalinapta ang fired cartridge kag fired bullets sa nanuha-tuhay nga direksyon kag may yara pa nga yara sa palibot sang kotse ni Larupay.
May yara man sang igu sang bala sa puertahan sang kotse ni Larupay.
Sa interview sang Bombo Radyo kay Police Major Raymond Celoso, hepe sang Sta. Barbara MPS, iya ginpahayag nga pito ang igu sang bala nga naangkon ni Larupay — isa sa tuo nga abaga, duha sa ilong, isa sa wala nga bahin sang dughan, isa sa wala nga abaga, isa sa wala nga kamot, kag isa sa likod sang abaga.
Narecover naman suno kay Celoso ang 6 pieces sang fired cartridge cases sang 45 caliber pistol, 2 pieces sang fired cartridge cases sang 9mm pistol, 2 ka bala sang wala pa na-identify nga armas-luthang, 1 metallic fragment, kag isa ka Jericho 9mm pistol.
‘NANAUG SA ELF TRUCK [SANDAY ESPOSO] KAG NAGPAARAK SANG LUTHANG’ — TRAFFFIC ENFORCER
Lain naman ang bersyon ni Iladio Galimbon, Jr., ang traffic enforcer nga nakasaksi sa krimen.
Sa interview sang Bombo Radyo kay Galimbon, iya ginpahayag nga nakit-an niya nga yara nagatindog sa kilid sang driver’s seat sang elf truck si Larupay.
Ginapahayag nga ginapakdol niya ang driver nga si Esposo.
Sunod nga naghalin si Larupay, nagbalik sa iya nga kotse agud magkuha sang pusil, kag sang nakita nanday Esposo kag sang duha niya ka kaupod nga nagkuha sang pusil si Larupay, gilayon man sila nga nanaug sa elf truck.
May dala nga pusil ang isa ka kaupod ni Esposo apang ginapahayag nga si Esposo ang nagpangamot sa pagpaarak-luthang kay Larupay sa kilid sang kotse tubtob nga natumba ini.
Ginpahayag man nga gin-check pa ni Esposo kun nagaginhawa pa ang biktima antes nalagyo.
Ginabanta lima ka segundos ang nagligad, nagbangon pa ang biktima, nagpalapit sa elf truck agud linglingon kun didto pa ang mga suspek, apang hinali man nga nag-uy-oy bangud sa mga pilas sa iya nga lawas.
Ini ang rason suno sa traffic enforcer kun ngaa yara sa kilid sang elf truck ang lawas sang biktima kag nagauyat pa sang pusil sang ginbawian ini sang kabuhi.
Sa subong, nagapadayon pa ang imbestigasyon sang otoridad.
Nagpahayag man ang Philippine Army nga indi sila maghilabot sa imbestigasyon sang PNP kag respetuhon nila kun ano man ang mangin resulta sini. #
