ILOILO CITY- Nagalaum ang Bureau of Fire Protection nga indi na madugangan pa ang insidente sang sunog subong nga Marso kadungan sang pag-obserbar sang Fire Prevention Month.
Sa interview sang Bombo Radyo kay Fire Senior Inspector Jesus Valenzuela, Iloilo City Fire Marshall, iya ginpahayag nga anom ka kaso lang sang residential fire kag duha ka post fire ang nalista subong nga Marso.
Suno kay Valenzuela, ini ang mas manubo sa nalista sang nagligad nga Marso 2020 nga anom ka residential fire, 16 ka grassfire kag 14 ka postfire.
Ginpahayag sang natungdan nga pila sa mga rason sang pagnubo sang insidente sang sunog amo ang eksido nga kampanya sang ahensya agud nga mapahanumdom sa pumuluyo nga mangin responsable sa sulod sang balay ilabi na sa paggamit sang kuryente.
Dugang pa niya, nakabulig man ang pagtinir lang sa balay sang mga tawo bangud sa pandemya rason nga mas maatindir sang mga pumuluyo ang ila puluy-an ilabi na ang mga appliances nga masami ginahalinan sang sunog.
