Ginaplano sang House Committee on Good Government and Public Accountability nga magrekomendar sa pag-file sang kaso nga plunder batok kay Vice President Sara Duterte kasunod sang P112.5 million nga confidential fund expenses.
Suno kay House Senior Deputy Speaker Aurelio “Dong” Gonzales Jr., mahimo ikonsiderar sang panel ini nga tikang kun indi ma-account ni Duterte ang amo nga kantidad nga gin-encash bilang cash advances sang Department of Education sang 2023.
Nahibaluan nga si Sara ang tiglikom sang ahensya halin sang Hulyo 2022 tubtub sang Hulyo 2024.
Pahayag pa ni Gonzales, kinahanglan gid ang transparency sa paggamit sang public funds.
“Kung ang Bise Presidente, bilang pinuno ng DepEd noong panahong iyon, ay hindi makapagbigay ng malinaw at sapat na paliwanag kung paano ginamit ang perang ito, tungkulin namin na ituloy ang kinakailangang mga legal na hakbang, kabilang ang kasong plunder, upang maprotektahan ang interes ng publiko,” suno kay Gonzales.
“Pera ito ng taumbayan, at kailangan nating tiyakin na ito ay nagamit ng tama,” dugang sang mamalidha.
Sa nagligad nga hearing sa Kamara, matandaan nga ginkwestyon ni Gonzales kun ngaa gin-withdraw ang pondo sa tatlo ka nagkalain-lain nga cheke nga kada isa nagabalor sang P37.5 million kag ginhimo sa nauna nga tatlo ka quarters sang 2023.
Ginplastar may anay sang mamalidha nga ang cheke ang gin-isyu kay DepEd Special Disbursing Officer (SDO) Edward Fajarda. Si Fajarda ang nalakip sa anum ka OVP officers kag personnel nga gin-subpoena sang House panel matapos pila ka beses nga wala nagtambong sa hearing.
Nagapati si Gonzales nga may yara sang iregularidad sa documentation bangud ang disbursement vouchers ang gin-label nga Maintenance and Other Operating Expenses (MOOE) sa baylo nga butangan sang “confidential funds.”
Pahayag pa sang kongresista, ang P112.5 million funds nga mainit sa mata sang Kamara ang lapaw pa gani sa plunder threshold nga yara sa P50 million. Isa ka non-bailable offense ang plunder nga mahimo silutan sang bilog nga kabuhi nga pagka-preso ang ginatudlo nga suspek.
“Kung hindi maipaliwanag ang paggamit ng P112.5 million, we may have no choice but to consider recommending the filing of a plunder case,” dugang sini.
Nahibaluan nga maid-id gid ang House panel sa paglantaw sa alleged irregularities sa paggamit sang Office of the Vice President sa confidential funds.
Natalana pa nga mag-isyu ang OVP sang statement ukon sabat kasunod sini nga development. #
