Gindepensahan ni former Chief Presidential Counsel Salvador Panelo si anay Presidente Rodrigo Duterte matapos nag-file sang disbarment case sa Korte Suprema ang pila ka human rights groups kag mga pamilya sang mga biktima sang extrajudicial killings.
Suno kay Panelo, wala sang basehan ang kaso nga ginpasaka bangud wala man sang nalapas si Duterte nga anuman nga layi bilang isa ka abogado.
Pahayag pa sini, indi matawag nga kriminal ang isa ka tawo kun wala man ini na-convict sa korte nga nakahimo ini sang krimen.
“Mayroon bang pruweba na pumatay siya? …Wala siyang pinapatay,” suno kay Panelo. “He has not committed any crime. Assuming he has committed a crime, you have to prove that beyond reasonable doubt, para maging accountable. That’s the only time you can file a disbarment charge against a member of the bar.”
“No court has yet to convict the former President of any crime involving the so-called extrajudicial killings. So wala na kaagad basis,” komento pa sini.
Kahapon, gin-file sang grupo nga Karapatan ang disbarment complaint bilang kabahin sang tikang nga masabat ni Duterte ang ginaalegar nga human rights abuses sa tion nga siya ang presidente sang Pilipinas.
Suno kay Atty. Vicente Jaime Topacio, isa sa nag-upod bilang complainant, saksi ang tanan kun paano gin-insult ni Duterte ang iban nga mga tawo, ginpakanubo ang mga babaye, kag nagpamatay gani nga wala ini sang kinamatarong nga mangin abogado.
Ginpahayag man sini nga dapat ipasaka sa Supreme Court ang mga statement ni Duterte sa House Quad Committee kun sa diin gin-ako sini ang pagpatay sa at least anum ka mga tawo sang mayor pa siya sa Davao City.
“Witness po tayong lahat dito, witness ang buong mamamayan dito. Nakita natin kung paano nag mura, kung papaano laitin ang mga kababaihan, kung papaano i-shortcut ang proseso, kung papaano ibalewala ang proseso, kung papaano pumatay ng tao ang taong ito,” suno kay Atty. Topacio. “Wala po siyang karapatan maging abugado po sa ating bansa.”
Ang pag-file sang disbarment case batok kay Duterte ang natabo matapos nagboluntaryo ini nga magpungko bilang abogado para sa iya anak nga si Vice President Sara Duterte-Carpio nga may tatlo ka impeachment complaints nga ginapangatubang.#
