Gin-release na sang Korte Suprema sa publiko ang resolution sa pagbasura sini sa request ni Senator Ronald “Bato” Dela Rosa para sa Temporary Restraining Order (TRO) kaangot sa warrant of arrest sang International Criminal Court (ICC).
Ginlakip man sa ginsapubliko sang Korte Suprema amo ang separate concurring and dissenting opinions sang justices.
Sa amo nga ruling, ginsaad nga gin-deny ang aplikasyon para sa TRO bangud sa kakulang sang merito.
Sang nagligad nga semana, ginpahibalo nga 9-5-1 ang boto nga nag-deny sang ginpangabay ni Dela Rosa nga TRO kag ang request sa deklasyon sang Status Quo Ante Order.
Ang nagboto agud nga ibasura ang request ni Dela Rosa amo sanday: Chief Justice Alexander Gesmundo, Senior Associate Justice Marvic M.V.F. Leonen, kag Associate Justices Alfredo Benjamin Caguioa, Rodil Zalameda, Samuel Gaerlan, Jhosep Lopez, Jose Midas Marquez, Filomena Singh kag Raul Villanueva.
Ang nagboto pabor sa gina-request ni Dela Rosa amo sanday: Associate Justices Ramon Paul Hernando, Amy Lazaro-Javier, Henri Jean Paul Inting, Ricardo Rosario kag Antonio Kho Jr.
Ang isa naman nga naka-leave amo si Associate Justice Japar Dimaampao.
Nagsiling ang korte nga napaslawan ni Dela Rosa nga mapamatud-an nga may yara siya sang klaro nga legal nga kinamatarong nga nagakinahanglan sang gilayon nga proteksyon.
Nakit-an man sang korte nga wala sang daku nga paglapas sa iya mga kinamatarong kag wala man sang insigida nga pagkinahanglan para sa provisional relief.
“There is no material and substantial invasion of Senator Dela Rosa’s rights. In the first place, Senator Dela Rosa has no clear and unmistakable right to be protected. He was also given protective custody by the Senate in the interim, which prevented the alleged service or implementation of the ICC warrant as well as his arrest,” suno sa Korte Suprema.
“Hence, Senator Dela Rosa’s claimed invasion of his purported rights is more imagined than real,” dugang sang korte.
Suno pa sa Korte Suprema, ang isa ka TRO ginahatag lamang kun may yara sang extreme urgency kag may peligro sang mabug-at nga inhustisya kag indi na maremedyohan nga halit kun indi ini mahatag dayon.
Pahayag pa sang korte, si Dela Rosa ang may obligasyon nga magpakita sang nagakaigu ukon mabug-at nga basehan para hatagan siya sang TRO, apang napaslawan siya nga mahimo ini.
“A TRO is issued only if the matter is of such extreme urgency that grave injustice and irreparable injury will arise unless it is issued immediately. Senator dela Rosa has a burden of proof to show that there is a meritorious ground for the issuance of a TRO in his favor. This, he failed to do,” dugang sang Supreme Court.
Ginklaro sang Korte nga wala pa sang pinal nga pagdesisyon ang Korte Suprema sa nagapanguna nga petisyon nga ginpasaka ni Dela Rosa kag anay Presidente Rodrigo Duterte nga nagakuwestyon sa legalidad sang kooperasyon sang Pilipinas sa ICC.
Sa baylo, siling sang korte nga ang isyu lamang nga gindesisyunan amo nga kun nagakaangay bala hatagan si Dela Rosa sang temporaryo nga proteksyon samtang pending pa ang main case sini.#
.){kind=link}