Wala gin-mensyonar ni President Ferdinand Marcos, Jr. ang pangalan sang iya magulang nga si Senator Imee Marcos sang naghatag ini sang speech kadungan sang pagpangampanya sang Alyansa Para sa Bagong Pilipinas sa Cavite.
Duha sanday Imee kag Las Piñas Rep. Camille Villar nga absent sa rally sang Alyansa, apang kay Imee lang nga pangalan ang ginlaktawan sa endorsement speech ni Marcos.
Ini na ang pangaduha nga tion nga wala nag-upod si Imee sa campaign rally sang Alyansa.
Una ini nga nag-absent sang nagpangampanya ang iya utod kag mga kandidato sang Alyansa sa Tacloban City, Leyte nga baluwarte sang ila iloy nga si former First Lady Imelda Romualdez Marcos.
Sang amo nga tion, nagprangka si Imee nga indi siya makakadto bangud indi sini mabaton ang pag-aresto kay former President Rodrigo Duterte sang Marso 11. Bisan pa may amo sadto nga statement si Imee, ginsambit gihapon sang Presidente ang iya pangalan sa speech.
Sang Huwebes, ginpangunahan naman ni Imee ang hearing sa Senate foreign relations committee nga nakatutok sa pag-aresto kay Duterte kun sa diin ginkwestyon pa sini ang mga hulag kag desisyon sang mga Cabinet Secretaries sang administrasyon sang iya manghod.
Sang ginpamangkot si Imee sa reaksyon sa latest speech sang President, nagsiling ini nga “okay lang”: “K lang, tutal sinabi ko na na ang aking tututukan ay ang pagsisiyasat ng mga pangyayaring labag sa batas noong kinuha si FPRRD.”
WALA SANG ENDORSEMENT HALIN KAY VP SARA
10 naman ka senatorial candidates ang ginasuportahan ni Vice President Sara Duterte, kag sa sini nga listahan, wala man si Imee.
Bisan pa nga kilala nga mag-abyan ang duha, gin-ako ni Sara nga wala pa na-istoryahan kun suportahan sini ang senadora sa iya nga reelection bid.
“Wala kaming napag-usapan about endorsement ni Senator Imee Marcos,” pahayag sini sa online press briefing, March 20.
Apang nagpasalamat si Sara kay Imee sa pag-initiate nga mapatigayon ang inquiry sa controversial arrest kay Duterte sang Marso 11.
“Let me just express my gratitude to senator Imee Marcos for opening the Senate investigation para siguro hindi na mauli at para napag-usapan siya sa loob ng pamahalaan at para malaga officially ‘yung mga posisyon ng iba’t-ibang tao, iba’t-ibang sektor kasama na rin posisyon ko as vice president at ‘yung document na galing sa Office of the President na pirmado ng ating pangulo,” suno sa Bise-Presidente.
Ang 10 nga iya ginasuportahan sa eleksyon ang lunsay kaalyado sang PDP party.
Ang PDP Senate slate nga nagalakip kanday reelectionist Senators Ronald dela Rosa kag Bong Go, lawyers nga sanday Raul Lambino, Jayvee Hinlo kag Jimmy Bondoc, kag actor nga si Philip Salvador.
Ang iban pa nga mga kandidato nga suportado ni VP amo si SAGIP party-list Rep. Rodante Marcoleta, detained pastor nga si Apollo Quiboloy, former Executive Secretary Vic Rodriguez kag Dr. Richard Mata.#
