Nagpasalig ang Iloilo City Government nga ginapadala gilayon sa Department of Information and Communications Technology (DICT) ang lista sang mga pangalan sa syudad sang Iloilo nga natublukan na sang COVID-19 vaccine — first dose man ukon second dose.
Sa interview sang Bombo Radyo kay COVID-19 team spokesperson Mr. Jeck Conlu, iya ginpahayag nga gina-send ini via email kag gina-send man ini nga lista sang vaccine recipients sa Department of Health (DOH).
Sang una, suno kay Conlu, bangud ginadali ang pag-rollout sang bakuna, manipis lang nga papel ang gin-isyu bilang vaccination card. Sang ulihi, nahimo na ini nga booklet.
Tanan nga data sa amo nga physical vaccination card ang naka-encode sa database suno sa natungdan.
Plano subong sang DOH nga magpa-gwa na sang unified certificate para sa fully vaccinated individuals.
Sa bahin sang DICT, padayon ang pagpanawagan sini sa mga local government units nga magsumite sang lista sang pangalan sang mga residente nga vaccinated na bangud may plano man nga ilunsar ang digital vaccine certificates.
Pwede nga ma-send ini nga line lists sang vaccinated individuals paagi sa DICT Vaccine Administration System ukon D-VAS.
Una diri, nagpahayag ang Department of Foreign Affairs nga ang vaccination cards nga ginagamit sang Pilipinas ang indi mabaton sa Hong Kong bangud wala ini nagikan sa isa lang ka source ukon lain-lain ang gina-isyu sang tagsa ka LGU. See Less
