Pagpakabakod kag pangamuyo ang taming sang mga overseas Filipino workers sa ila padayon nga pagtrabaho sa sa tunga sang COVID-19 pandemic.
Isa diri amo si Fredo Biogos Beatingo, tumandok sang Sara, Iloilo kag 12 na ka tuig nga nagatrabaho sa Kuwait.
Sa interview sang Bombo Radyo kay Beatingo, iya ginpahayag nga sang ginpatuman ang lockdown sa ila nga lugar sang Marso tubtob sa tunga-tunga sang bulan sang Agusto, isa man siya sa nadulaan sang trabaho.
No Work, No Pay ang patakaran suno kay Beatingo rason nga madamo man nga Pinoy ang napahalin sa trabaho, ginpapauli sa Pilipinas, kag nagnubo ang sweldo.
Sang amo nga tion suno sa natungdan, wala na sila naglagas sang mataas nga sweldo bangud ang importante amo nga makakaon sila kag makapadala sa pamilya.
“Nagkaroon ako ng severe symptoms ng COVID. Nag-quarantine ako. Ang mabudlay is…indi mo masugid sa imo nga pamilya kay ga-worry ka man sa ila kag wala man sila sang mahimo para sa imo kay didto sila sa Pilipinas. Naga-struggle ka pero ikaw lang gid isa.”
Remedyo lang ang ginhimo suno sa iya kaangay sa iya naandan nga ginahimo sa Iloilo — paggamit sang luy-a, pahuway, kag pagtinir sa sulod sang balay.
Daku man ang nabulig sang online prayer meeting kaupod ang iban nga prayer warriors kag iban nga mga Pinoy sa Kuwait.
Ini man ang ila nga nangin salandigan sang tion nga tuman ka daku ang epekto sang krisis sa mental health sang OFWs kun sa diin may yara pa sang narekord nga nagpanginmatay.
Sa subong, nagatrabaho bilang cashier si Beatingo sa Kuwait.
Kaangay sang iban nga OFWs, handum kag dumot man niya nga makapauli kag makabisita sa iya pamilya sa Pilipinas.
“Nandito ako ngayon sa abroad, nakapagprovide ako sa family ko. Pero indi lang gali amo ina ang kinahanglan. Bisan diri ako sa abroad, ang importante is mahikayat ko ang family ko na magtiwala sa Diyos. Isang malaking lesson sa akin na hindi lang pera ang kailangan natin sa mundo. Ang importante nakikilala natin ang Panginoon,” pahayag ni Beatingo.
