Wala nakapugong ang chronic autoimmune disease sa isa ka teacher agud padayunon ang iya handum nga makatudlo sa mga kabataan sa ila lugar.
Sa World Teachers’ Day Special sang 𝑮𝒐𝒐𝒅 𝑴𝒐𝒓𝒏𝒊𝒏𝒈 𝑷𝒉𝒊𝒍𝒊𝒑𝒑𝒊𝒏𝒆𝒔, naghatag sang inspirasyon ang istorya ni Neri Rose Natuel Dalen, isa ka elementary teacher sa Fernando A. Arlos Memorial School (FAAMS) sa Concepcion, Iloilo. Tumandok si Dalen sang Barangay Tambaliza sang amo nga banwa.
Suno kay Dalen, isa ka daku nga pagpanghangkat nga iya naagyan amo ang lupus, isa ka kondisyon kun sa diin ginaatake sang immune system ang healthy tissues kag organs nga rason sang nagalapta nga inflammation kag damage.
Pahayag sini, sang 2017, nanotisyaran sini nga nga may nagtubo sa iya guya nga daw kagat lang sang lamok; tubtub nga wala nag-ayo, kag sang ulihi nawad-an na ini sang gana sa pagkaon, kag na-unot ang iya nga buhok.
Sang 2018, nagtubo pa gid ang lamuti sa iya tiil, nagdaku, kag sang ulihi, indi na siya madala ang iya tiil.
“Gina-example ko gani ang paho nga hanog. Sa guwa daw okay siya, pero kun hikapon mo [ang akon panit], daw may mga bilog-bilog kag masakit. May ara month nga okay ako, pagkadason nga month, indi mo mapaktan. May mga times man nga days lang. For example abi, okay ako subong, pero pagka-buwas, gulpi lang ako hilanaton nga wala man sang rason,” suno kay Dalen.
Magluwas sa sakit sa iya nga lawas, nangin sensitibo man si Dalen kag wala na nanamian sa mga gahod kag musika pati na sa mga kadlaw nga iya mabatian.
Sang naglala na ang masakit, napilitan ini nga mag-leave anay sa trabaho sa sulod sang duha ka bulan. Gin-ako man sini nga sang nagtuhaw ang iya balatian, wala man sini nalikawan ang pagkwestyon sa Ginuo.
“Sang time nga to, na-kwestyon ko gid: ‘Lord ngaa ako? Ngaa amo gid ni kalain sang akon nabaton nga sakit?’ Ara ako sa stage sang denial. Indi ko gusto ang music, indi ko gusto ang mga nagakinadlaw,” pahayag niya.
Apisar sini tanan, nagpangisog si Natuel nga buligan ang kaugalingon, untaton ang pag-isahanon, kag magbalik sa normal sini nga buluhaton.
“Gin-gaan ako ni Lord sang second chance, gingaan niya ako sang second life, so dapat mangin strong pa gid ako dapat,” suno pa sa iya. “Indi ko dapat magmukmok. Kinahanglan, siling ko, blooming ako gyapon. Nagkuha ako sang pangilay kag lipstick, nanghusay ako. Ginpagwapahan ko akon kaugalingon,” dugang ni Dalen.
Nagpasalamat ini sa iya pamilya, doktor, kag tanan nga nagsuporta sa iya ilabi na sang tion nga nagbatyag ini nga halos na ini sang pulos.
Nagapadayon subong si Dalen sa iya propesyon bilang manunudlo. Sang Hulyo subong nga tuig, nagtakos na ini sa 10 ka tuig sa teaching profession, propesyon nga iya gintawag bilang isa ka “calling”.#
