Ginplastar naman ni Retired Chief Justice Artemio Panganiban nga ang 16-vote threshold agud i-convict si Vice President Sara Duterte ang indi dapat pagkabigon bilang fixed number.
Suno kay Panganiban, ang constitutional requirement sang “two-thirds of all the members of the Senate” may katumbas nga 16 sa 24 ka mga senador ang indi mahimo nga masami nga ibase lamang sa simple nga arithmetic ukon matematika.
Pahayag ni Panganiban, dapat gamiton sang mga senador ang “common sense” sa paghangop sa probisyon sang Konstitusyon, nga ginagiyahan sang kamatuoran kag pagka-matarong, sa baylo nga magsalig lamang sa literal nga pagbasa sa layi ukon intensiyon sang mga nagbalay sini.
Ginpunto man niya nga ang mga senator-judge ang wala nagahulag bilang ordinaryo nga mga hukom, kundi bilang mga gin-elihir nga mga tiglawas nga ginagamit ang gahom sang Senado sa idalom sang Konstitusyon agud paagyon sa trial ang mga kaso sang impeachment.
Ginkuwestiyon man ni Panganiban kun dapat tugutan nga magboto ang mga senador nga i-convict ukon i-acquit si VP Sara bisan wala man ang mga ini nagapartisipar sa proceeding.
Suno sa iya, ang pagtumod sa kamatuoran sa isa ka impeachment trial ang nagakinahanglan sang maid-id nga pagtuon sa mga ebidensiya kag personal nga pagpamati sa mga testigo, kalakip ang pagpanilag sa ila nga body language, tono sang tingog kag pamaagi sang pagsabat.
Ginpunto man ni Panganiban ang sitwasyon sang mga senador nga mahimo nga nagapanago, yara sa iban nga pungsod, napreso, naospital ukon iban pa nga rason sang indi nila pagtambong sa trial.
Ini nga posisyon ni Panganiban ang nagdugang sang isa pa ka argumento batok awtomatiko nga pagtrato sa two-thirds sang Senado bilang fixed nga 16 ka boto, apang wala siya nagmungkahi sang isa ka partikular nga alternatibo nga numero sa iya nga presentasyon bilang friend of court.
Sa katapusan, ginsiling sini nga ang Senado gihapon ang may ulihi nga desisyon kag wala sang probisyon sa Konstitusyon nga nagahatag sang paagi para iapelar sa Supreme Court ang desisyon sang Senado sa isa ka impeachment trial.
