ILOILO CITY – Nakuhaan sang halos tunga sa milyon ka pesos nga balor sang iligal nga droga ang lalaki sa ginpatigayon nga drug buy-bust operation sang Regional Police Drug Enforcement Unit Region VI kag Arevalo Police Station sa Zone 1 Barangay Mohon, Arevalo, Iloilo City.
Ang durugista amo si Danilo Ardonia, alias Erp, 39, residente sang Barangay Pakiad, Oton, Iloilo.
Nakuha sa iya ang ginabanta 65 grams sang shabu nga may standard drug price nga P442, 000.
Sa interview sang Bombo Radyo kay Police Major Rommel Anicete, head sang Regional Police Drug Enforcement Unit, iya ginpahayag nga sang nagligad nga bulan, nakabaton sang report ang ila opisina nga nagaduso sang droga ang nasambit nga durugista.
Suno pa sa natungdan, wala sang daan nga record sa iligal nga droga si Ardonia.
Base sa imbestigasyon sang otoridad, diri lang sa Iloilo City ang source sang iligal nga droga.
Sa subong, preso na si Ardonia kag natalana nga pasakaan sang kaso nga paglapas sa Republic Act 9165 ukon ang Comprehensive Dangerous Drugs Act of 2002.
