ILOILO CITY – Arestado ang pangayaw nga mag-live-in partner sa ginpatigayon nga drug buy-bust operation sang Anilao Municipal Police Station kag Iloilo Provincial Drug Enforcement Unit team 2 sa Barangay Pantalan, Anilao, Iloilo.
Ang mga arestado amo sanday Jose Onofre Lacupa, alyas Jr., 35, residente sang Barangay Pagdugue Dumangas, Iloilo; kag Jerry Mae Lacupa, alyas Mayang, 39, masahista kag residente sang Bacolod City.
Si alyas Mayang ang asawa sang una sang paryente man ni alyas Jr. kag sila naman subong ang magkahagugma.
Nakuha sa ila ang ginabanta 15 grams sang ginapatihan shabu nga may estimated drug price nga P102,000.
Sa interview sang Bombo Radyo kay Police Captain Maria Fe Umiten, acting chief of police sang Anilao Municipal Police Station, iya ginpahayag nga duha ka semana nga ginpaidalom sa monitoring ang mag-live in partner.
Suno kay Umiten, bilog nga probinsya ang ginabaligya-an sang duha kag sila mismo ang nagapili sang lugar rason nga nakalab-ot sila sa Barangay Pantalan.
May mga tion suno sa iya nga solo lang si alyas Jr. nga nagapatigayon sang transaksiyon.
Pahayag dugang sang natungdan, magluwas sa Dumangas, Iloilo, may boarding house man ang mag-live in partner sa syudad sang Iloilo.
