Nagpanawagan si Senator Kiko Pangilinan sa Department of the Interior and Local Government (DILG) nga i-check kun na-identify sang maayo ang bangkay ni anay Undersecretary Catalina Cabral.
“We do not wish to be insensitive if indeed death has been established but considering that billions of pesos are involved, we call on Sec. Jonvic Remulla to check and validate if the remains of former Usec. Cathy Cabral were properly identified by the authorities concerned,” suno sa senador.
Dugang niya, “Faking death to escape criminal liability for corruption has happened before.”
Ginlakip sini sa iya post ang news item kaangot kay Mary Ann Maslog. Isa siya ka businesswoman nga nangin bantog matapos ginpeke sini ang iya kamatayon agud indi ma-convict matapos na-implicate siya sa P24-million graft case sang 1998.
Matandaan nga nasapwan ang lawas ni Cabral sa idalom sang pil-as sa Kennon Road, Tuba, Benguet sang Huwebes sang gab-i. Gina-alegar nga nahulog ini sa amo nga lugar.
Una na nga nagpamalibad ang iya pamilya, partikular ang iya bana, nga ipaidalom sa autopsy ang bangkay sang anay DPWH official. Apang sa update sang Philippine National Police (PNP) subong nga aga, ginkumpirma sini nga naka-negosyar na si Benguet Police chief Police Colonel Lambert Suerte sa pamilya nga magpatigayon sang autopsy.
Ini man ang rason kun ngaa na-retain si Suerte sa iya nga posisyon. Ang gin-relieve lamang amo si Tuba municipal police chief Police Major Peter Camsol bangud sa ginapahayag nga mishandling sa kaso.
Magluwas sa autopsy, nagmandu naman ang DILG nga magpatigayon man sang DNA test para ma-check ang bangkay.
Nahibaluan nga na-implicate si Cabral sa flood control corruption scandal, kag ginpatawag man anay sang Independent Commission for Infrastructure (ICI) para sa hearing sang Lunes, apang wala ini nagsipot.#
