Panibag-o nga reklamo ang ginapangatubang ni anay Health Secretary Janette Garin kag iban pa sa Department of Justice (DOJ) may kaangtanan sa mga napatay sa Dengvaxia vaccine.
Apat ka mga indibidwal ang nagpasaka sang reklamo bangud sa reckless imprudence resulting in homicide batuk kay Garin kag iban pa nga mga anay opisyal.
Gin-akusaran man ang mga ini nga naglapas sa Republic Act 9745 ukon Anti-Torture Act of 2009.
Magluwas diri, gin-alegar sang mga tagreklamo nga naglapas si Garin kag iban pa sa Consumer Act of the Philippines kag Philippine Pharmacy Act.
Natabo ini isa ka adlaw matapos nga ginbawi sang Department of Justice (DOJ) ang 19 ka kaso para sa reckless imprudence nga nagresulta sa homicide nga ginpasaka batok kay Garin kag sa duha ka iban pa.
Una na nga ginlaragway ni Garin ang desisyon sang DOJ nga i-drop ang mga nauna nga panumbungon batuk sa iya bilang “victory for science.”
Sang 2017, ginmando sang Food and Drug Administration ang pagsuspinde sang pagpanagtag kag pagpamaligya sang Dengvaxia vaccine kag ang pag-withdraw sang produkto sa merkado.
Ini matapos nga nagpaandam ang Dengvaxia manufacturer nga Sanofi nga posible makatuga sang malala nga balatian ang bakuna sa malawig nga panahon para sa mga wala pa natapikan sang dengue antes ang pagbakuna.
