Nagpatuman sang panibag-o nga fuel surcharge ukon pagtaas sa presyo sang gatong para sa mga domestic kag international flights.
Ini matapos nga yara na sa Level 19 ang airline fuel surcharge halin Abril 16 tubtob 30 bangud sa nagapadayun pa nga kinagamo sa Middle East.
Isa ini ka dako nga pagbag-o matapos nga yara pa lang ini sa Level 8 sang nagligad nga Abril 1 tubtob Abril 15 kun sa diin nadugangan lang sang P253 tubtob P787 ang pamasahe sa domestic flights, samtang nadugangan naman sang masobra P800 tubtob P6,200, sa international flights.
Subong nga yara na sa Level 19 ang Pilipinas, madugangan na ang pamasahe para sa domestic flights sang masobra ₱627 tubtob masobra ₱1,800 kag masobra ₱2,000 tubtob ₱15,300 para naman sa international flights.
Suno kay Department of Transportation Secretary Giovanni Lopez, indi gid malikawan ang pagsaka sang plete sa eroplano bangud nga mataas man ang presyo sang jet fuel nga yara na sa $200 per barrel.
Ginpa-athag man sang Civil Aeronautics Board nga kinahanglan man sa gihapon sang mga airlines nga mag-appy for approval antes nga magpatuman sang surcharge.
Dugang pa sang ahensya, magapadayun ang pagbag-o ukon fuel surcharge kada 15 ka-adlaw samtang wala pa sang estable nga suplay sang fuel kag wala pa nagbalik ang presyo sini sa normal.
Words by: Bombo Joedel Rosas Nollaga
