ILOILO CITY – Ginlamon sang kalayo ang panimalay sang halos 60 ka mga pamilya sa Brgy. Ortiz, Iloilo City Proper.
Madasig nga naglaton ang kalayo bangud kalabanan ang himo sa light materials kag ikit-ikit ang mga panimalay.
Sa interview sang Bombo Radyo kay Serafin De Asis, iya ginapahayag nga nagsugod ang kalayo sa balay nga ginapanag-iyahan ni Widson Dagunoc.
Suno kay De Asis, nakibot lang sila sang may naglupok kag madasig nga naglapta ang kalayo.
Dugang sang natungdan, wala sang tawo sa balay kag posible nga wala napatay nga mga switch ang ginhalinan sang kalayo.
Sa subong, padayon pa nga gina imbestigahan sang Bureau of Fire Protection ang ginhalinan sang kalayo.
