Ginpakigbahin sang delegasyon sang Region 6 sa Palarong Pambansa ang ila nga winning formula sa patag sang Athletics.
Kasunod ini sang pagdaug sang bulawan nga medalya sang mga barefoot athletes ukon mga atleta nga nagatiniil lamang sa ila nga kompetisyon.
Ang nasambit nga mga atleta amo anday Trixia Arellano, Ayene Dhawn Cabalfin, kag Eda Mae Arceo.
Si Arellano nga halin sa Concepcion Central Elementary School ang nagguba sang palaro record sa elementary girls’ 200m dash matapos nakarecord sang time nga 26.4 seconds nga mas madasig sa 17 ka tuig nga record ni Maureen Schrijvers nga may oras nga 26.7 seconds sang 2008.
Si Cabalfin nga pride sang Barosbos Elementary School sa Carles, ang nangibabaw sa 400-meter dash elementary girls.
Si Arceo naman nga pride sang Carles Central Elementary School ang nagdaug sa 100m Hurdles – Elementary Girls Category.
Suno kay Benedicto C. Prasas, Master Teacher 1 sang Carles Central School, bag-o nila ginaputos sang plaster ang tiil sang mga atleta, ginabutangan anay nila sang pantyliner kag wetwipes ang dapa-dapa sang mga ini agud magserbe nila nga swelas.
Suno sa iya, base sa eksperyensiya, mas madasig ang dalagan sang mga ini kun wala sang sapatos.
