ILOILO CITY – Gin-ulan sang mga negatibo nga komento ang liwat nga pag-abiso sang actress nga si Julia Barreto sa iya ex-boyfriend nga si Joshua Garcia nga indi anay magsulod sa isa ka relasyon kag i-enjoy ang single life.
Suno sa mga netizens, daw kaangay nga ‘selfish’ si Julia.
May yara man sang nagakomento nga mangin rebound ni Julia si Joshua sa tion nga magbulagay sila sang iya boyfriend nga si Gerald Anderson.
Sa isa ka interview, ginpakigbahin ni Julia nga may yara sila sang reunion movie ni Joshua.
Ginpakigbahin man niya ang mga pila ka mga gin-istoryahan nila sang iya ex boyfriend.
Suno kay Julia, ginakamusta niya si Joshua kag ginapamangkot kun bala may girlfriend na ini kag gin-abisuhan nga indi lang anay magsulod sa isa ka relasyon.
Ginpaathag man ni Julia kun ngaa nga indi niya gusto nga magka-girlfriend na si Joshua.
Suno sa iya, dapat nga i-enjoy ni Joshua kun ano man ang may yara siya subong.
Bata pa si Joshua kag isa ka brilliant actor kag indi pa ini ang tion nga mangin ‘limited’ ang aktor.
Dugang pa ni Julia, nagapabilin nga mag-abyanay sila ni Joshua.
Suno sa iya, ginarespeto ni Joshua ang iya nobyo nga si Gerald Anderson.
Kung madumduman, sang April 2021, ginpanugyanan man ni Julia nga indi anay mag-girlfriend si Joshua.
Nagbulagay ang duha sang 2019.
