Iloilo City – Nagpahanumdom ang Iloilo City Task Force on Morals and Values Formation nga hugot ang pag-monitor sa pagpasulod sang mga menor de edad sa mga lodging houses, inns, motels, kag kaangay nga mga establisyemento subong nga Valentine’s Day.
Ini matapos nga may yara sang nadakpan nga magkahugma sang nagligad nga tuig kun sa diin, ginpasakaan sang kaso ang legal-aged partner kag ginpasirado sang temporaryo ang establisyemento.
Nahibaluan nga nakasaad sa Regulation Ordinance No. 2015-447 sang Iloilo City ang pagdumili sa pagbaton sang mga menor de edad sa mga motels, lodging houses, inns, pension houses, kag resorts.
Sa interview sang Bombo Radyo kay Nestor Canong, pinuno sang amo nga taskforce, iya ginpahayag nga sandig sa ordinansa, may salabton ang mga establisyemento sa tion nga madakpan nga nagapasulod sang menor de edad.
Kaangot diri, suno kay Canong, wala man sang luwas ang mga taxi drivers nga nagdul-ong sa mga menor.
Ginpahayag sang natungdan nga kadungan sa Valentine’s Day ang pag-aligmat man sang mga otoridad agud mapasiguro ang seguridad sang mga pamatan-on.
Sa subong, may yara sang 21 ka mga lodging houses kag inns sa bug-os nga syudad sang Iloilo.
