Ginapadasig pa gid sang Presidential Anti-Organized Crime Commission (PAOCC) ang proseso sa pag-apply para sa blue notice sa International Criminal Police Organization ukon Interpol agud malimitahan ang hulag ni anay Bamban, Tarlac Mayor Alice Guo ukon ang Chinese national nga si Guo Hua Ping.
Ang Interpol blue notice amo ang gina-isyu para nga makakolekta sang dugang nga mga impormasyon kaangot sa identity sang isa ka tawo, lokasyon, kag mga aktibidad kaangot sa isa ka criminal investigation.
Suno kay PAOCC spokesperson Dr. Winston Casio, ang ila basehan para sa request sa blue notice amo ang criminal complaints batok kay Guo kaangot sa illegal Philippine Offshore Gaming Operators ukon POGOs sa Bamban.
Sa subong suno sa iya, informal pa ang arrangement sang Pilipinas para sa surveillance kay Guo kag sa iya kaupod, apang kun i-grant na sang Interpol ang blue notice request sang Pilipinas, ma-monitor sila 24/7 kag ma-secure ang ila nga lokasyon.
Una na nga ginpahayag sang PAOCC nga nagapati sila nga yara pa gihapon si Guo sa Batam Island sa Indonesia.
Sa amo man nga isla nadakpan ang iya kaupdanan nga sanday Sheila Guo kag Cassandra Li Ong. Una na nga ginpahayag sang Indonesian authorities nga antes sila nakasulod sa Batam, halin sila sa Singapore kag nagsakay sa cruise ship patabok sa isla kun sa diin gin-book pa sila sa apat ka hulot sa isa ka hotel.
Ginalantaw subong sang PAOCC nga posible nga separado na ang hulag nanday Alice Guo kag iya utod nga si Wesley kasunod sang pagka-aresto sa ila duha ka kaupdanan.
Importante para sa opisina nga madala-balik sa Pilipinas ang anay alkalde agud maatubang sini ang human trafficking kag tax evasion complaints batok sa iya nga napasaka sa Department of Justice. Magluwas diri, ginalantaw man nga mangin lyabe si Guo para nga mabuksan ang local kag foreign network sang posible nga transnational criminals.
