Natalana nga mag-file ang Presidential Anti-Organized Crime Commission (PAOCC) sang seryoso kag wala-pyansa nga kaso-kriminal batok sa kontrobersyal nga alkalde sang Bamban, Tarlac nga si Alice Guo matapos nakit-an ang mga ebidensya nga naga-angot sa iya sa iligal nga operasyon sang Philippine Offshore Gaming Operators (POGO).
Suno sa spokerspon sang talatapan nga si Winston John Casio, magasapol ang inter-agency body subong nga semana agud nga matumod kun ano nga sahi sang kaso ang i-file batok sa alkalde nga subong kwestyonable man ang identity kag citizenship.
Kasunod sang raid sang amo nga opisina sa Pogo compound sa Bamban, nakit-an suno kay Casio nga yara ang pangalan kag pirma ni Guo sa mga dokumento. Sang nagligad nga gab-i suno sa iya, may na-recover man sila nga opisyal nga dokumento nga pirmado man ni Guo.
Ginalauman suno sa spokesperson nga ma-file ang kaso sa Department of Justice (DOJ) antes ang Hunyo 21.
Base sa raids sang commission kag imbestigasyon sa Senado, na-establisar anay nga may transaksyon si Guo sa Chinese firms nga involved sa Pogo operations sa Bamban nga naga-operate bisan nga kulang sa permit halin sa gobyerno.
Ginalantaw man subong sang PAOCC ang posible nga kaangtanan sa tunga sang Pogo hub sa Bamban kag compound nga yara naman sa Porac, Pampanga nga gin-raid sang nagligad lamang nga semana.
