Gina-imbestigaran sang Presidential Anti-Organized Crime Commission (PAOCC) kun mga espiya sang China ang Chinese nationals nga ila nadakpan sa ginaalegar nga Philippine offshore gaming operator (POGO) hub sa Calamba City.
Ini matapos nga may nakit-an nga telecommunications equipment sa site kun sa diin natabo ang operasyon.
Suno kay PAOCC executive director Gilbert Cruz, wala ginadula ang posibilidad nga involved gid man ang foreigners sa pagpang-espiya bangud sa sensitibo nga communications equipment.
Ini nga Chinese nationals ang wala man sang ginauyatan nga legal nga mga dokumento.
Nahibaluan nga isa ka guerrilla-type POGO facility ang gin-raid sang opisina kaupod ang Criminal Investigation and Detection Group (CIDG).
Gintumod man sang mga pulis sa CALABARZON ang tatlo ka mga suspek nga amo sanday Lou, Weng kag Yuan.
Sa amo man nga tion, 23 Filipino workers nga naga-trabaho para sa amo nga foreigners ang gindala man sa kustodiya sang otoridad.
Una nga nasuspetsahan ang amo nga site bangud nanotisyaran sang mga pulis ang communications tower malapit sa apartment nga nagaserbe nga work station sang mga suspek.
Nanindugan naman ang Pinoy workers nga gin-hire lamang sila agud nga magbutang sang telecommunications infrastructure.
Matandaan nga sang nagligad nga bulan, may naaresto man ang National Bureau of Investigation (NBI) nga lima ka Chinese nationals sa separado nga mga operasyon sa Manila, Dumaguete kag Palawan bangud sa pagpang-espiya sa military camps kag assets sang Pilipinas.
