Nagpasaka ang otoridad sang qualified human trafficking complaint batok kay former presidential spokesperson Harry Roque kag sa duha ka iban pa bangud sa ginaalegar nga involvement sa Philippine Offshore Gaming Operator (POGO) nga naangot sa iligal nga mga aktibidad.
Sa supplemental affidavit nga gin-file sa Department of Justice, ginlakip sang Presidential Anti-Organized Crime Commission (PAOCC) kag Philippine National Police – Criminal Investigation and Detection Group (PNP-CIDG) si Roque, Ley Tan, kag Mercedes Peralta Macabasa sa mga complaint nga ginpasaka batok kay Cassandra Li Ong.
Ginpahayag nga bangud ini sa “active participation” ni Roque sa pagpasangkad sang iligal nga aktibidad sang POGO hub nga Lucky South 99.
Sa reklamo, may yara sang testimoniya halin kay PAGCOR assistant vice president Jessa Fernandez nga nagakumpirma nga nagkit-anay sanday Ong kag Roque sang Hulyo 26, 2022. Gina-alegar nga may pila pa gid ka follow-ups si Roque kay Fernandez natuhoy sa status sang gambling license renewal sang Lucky South 99.
Ginpakamalaot naman ni Roque ang kaso nga gin-file sa iya.
Pahayag sini, nalab-utan pa sang apat ka bulan matapos ang raid sa Porac, Pampanga antes nakapangita ang PAOCC sang mga testigo nga magasugot sa paghimo sang kabutigan para ma-implicate si Roque.
Nahibaluan nga tubtub subong, wala nagapakita si Roque sa otoridad bangud gindagdagan ini sang contempt order sang quad comm sa Kamara bangud sa iya pagpamalibad nga magpasa sang mga dokumento nga ginapatihan sang apat ka House committees nga maga-angot man sa iya sa illegal activities sang POGO.
