Gin-ako na sang 40-anyos nga aktor nga si Paolo Contis nga “single” siya subong.
Ini ang una nga bes nga nagprangka si Paolo anum ka bulan matapos nagguwa ang espekulasyon nga bulagay na sila sang aktres nga si Yen Santos.
Sa “Fast Talk with Boy Abunda”, ginpili ni Paolo ang “single” sang ginpamangkot sang host kun “single” siya ukon “taken.”
Mayo sang nagguwa ang huring-huring nga nag-break na sila sang 31-anyos nga aktres matapos nga gin-delete ni Yen ang iya birthday greeting sa actor sa Instagram.
Isa ka semana ang makaligad sadto, ginsiling ni Paolo nga gusto niya nga ipabilin anay nga “personal” kun matuod ini ukon indi. Pagkasunod nga bulan, gin-unfollow na sini si Yen kag gin-private man ang account sa Instagram.
Nangin kontrobersyal ang relasyon sang duha bangud si Yen ang ginatudlo nga third party sa anay relasyon ni Paolo sa iya anay live-in partner nga si LJ Reyes. May anak si LJ kag Pao nga si Summer.
Enero 2023 naman sang ginkumpirma ni Pao nga sila na ni Yen apang nagpanginwala sa third party allegations.
Sa pihak nga bahin, kasado naman si LJ sang Oktubre 2023 kay Philip Evangelista. Ginpatigayon ang intimate garden wedding sa The Bevin House, isa ka Victorian mansion sa 76 Bevin Road, Asharoken, New York.#
