Gin-athag sang Commission on Human Rights (CHR) nga indi mangin conclusive ang resulta sang Paraffin test sa siyam ka mga napatay matapos ginapahayag nagbato sa mga otoridad sang ginserbihan sang search warrant sa Brgy. Roosevelt kag Lahug Tapaz, Capiz.
Una na ginpahayag nga duha sa siyam ka mga napatay nga ginapatihan myembro sang New People’s Army (NPA) ang nagpositibo sa gunpowder nitrates ukon paraffin testing.
Katuyuan sang paraffin test nga makumpirma kun may presensya sang gun powder residue ang mga kamot sang biktima kag matul-id nga naggamit sang armas luthang.
Sa exclusive interview sang Bombo Radyo Iloilo kay Atty. Jonnie Dabuco, Director sang CHR Region 6, iya ginpahayag nga kun magnegatibo ukon magpositibo ang isa ka tawo sa paraffin examination, wala ini nagakahulugan nga nagpalupok ini ukon wala sang armas-luthang.
Suno kay Dabuco, madamo sang posibilidad nga makaapekto sa palibot sang mga biktima kaangay na lamang sang hangin nga mahimo makapalid sang gunpowder residue sa insidente.
“Aid of Investigation” lamang suno kay Dabuco ang mga naggwa nga resulta sang paraffin testing.
Sa subong suno kay Dabuco, nagatipon sila sang nagakaigo nga mga testimoniya sang mga witness kag iban pa nga dokumento sa padayon nga imbestigasyon.
Nakadepende man suno sa iya ang ipasaka nga kaso sa tion nga may resulta na ang ila imbestigasyon.
