Maka-guwa na sa presuhan ang South African Paralympic champion nga si Oscar Pistorius matapos ini nahatagan sang parole.
Bantog si Pistorius bilang “Blade Runner” bangud sa iya carbon-fibre prosthetic legs kag ginkilala man nga public hero sang nangin isa ini ka kampyon sa Paralympics apang sang ulihi, labi ini nga nangin kilala indi bilang sports figure kundi bilang murderer.
Valentine’s Day sang 2013 sang ginpatay sini ang iya nobya nga si Reeva Steenkamp.
PHOTO: DUIF DU TOIT/GALLO IMAGES/GETTY; GIANLUIGI GUERCIA/AFP VIA GETTY (via People)
Apat ka beses niya ini nga gintiro kag una gin-claim nga nasal-an lamang niya ini nga kawatan.
Una siya nga nasentensyahan sang lima ka tuig nga pagka-preso sang 2014 bangud sa culpable homicide apang sang ulihi, nangin guilty ini sa murder kag ginpalawig sang anum ka tuig ang sentensya.
Sang 2017, gindoble sang Korte Suprema sa 13 ka tuig kag lima ka bulan ang iya kabug-usan nga sentensya bangud nanubuan ang korte sa anum lamang ka tuig.
Apang sang sini lang, gin-anunsyo sang Department of Correctional Services nga iga-release na sa Enero 5 ang amo nga South African star bangud sa parole nga ginhatag.
Kun balikan, 29 anyos pa lamang ang girlfriend kag tatlo ka bulan pa lamang nga may relasyon kay Blade Runner sang natabo ang insidente. Isa siya ka law graduate kag model nga naga-trabaho man bilang TV presenter.
Kasagsagan man ang amo nga tion sang pagkabantog ni Blade Runner bangud sa sampaw-sampaw nga bulawan nga medalya nga nadag-an sa Paralympics kag nangin labing-una man nga amputee runner nga naka-compete batok sa non-disabled athletes sa London 2012 Olympics.
