ILOILO CITY – Nagpanugyan ang isa ka eksperto sa ‘Parenting in the New Normal’.
Sa interview sang Bombo Radyo kay Francis Ray Subong, Registered Guidance Counselor kag Public Relations Officer sang Philippine Guidance and Counseling Association, iya ginpahayag nga sa subong nga may pandemya, tuman ka importante ang rolyo sang mga ginikanan.
Suno kay Subong, ang mga ginikanan ang nagakadapat nga magpanguna sa pagiya sa mga kabataan agud indi ang mga ini mabuyo sa kalainan subong nga may pandemya.
Ginhalimbawa sang natungdan nga dapat tutukan sang ginikanan amo ang pagtuon sang ila mga kabataan ilabi na nga online subong ang klase.
Suno kay Subong, ang mga ginikanan ang nagaporma sang mga kabataan kag samtang indi pa makadesisyon sa ila kabuhi nagakadapat nga giyahan ang mga ini agud indi sila maglisa sang banas.
Bilang ginikanan, nagakadapat suno kay Subong nga intindihon nga nabuhi ang mga kabataan sa subong nga henerasyon sa diin nababad ang mga ini sa social media.
Sa pihak sini, nagakadapat nga tudluan sang mga ginikanan ang ila kabataan nga indi lang digital world ang ila panumdumon kag nagakadapat nga balansehon ang lifestyle.
Halimbawa na diri ang paghugas sang pinggan, paghimos, pagtanom, pagpanglaba, pag-plantsa kag pag-piod sang mga linabhan.
