Patay ang isa ka pari sa Ecuador matapos matumbahan sang daku nga krus samtang yara ini sa sulod sang Simbahan.
Ginkilala ang pari nga si Father Patricio Sánchez Molinari sang Our Lady of Perpetual Help Church sa southern Guayaquil.
Naka-livestream ang misa kag natabuan gid nga ang sentro sang sermon sini amo nga malip-ot ang kabuhi gani nga ginpahangop sini ang importansya sang paghatag sang tion sa Dios kag sa pamilya.
Mabatian sa misa nga ginpaathag ni Molinari ang mga pulong ni Hesus, kun sa diin ginpanawagan niya sa mga tumuluo nga indi pag-usikan ang ila kabuhi sa padayon nga paggamit sang cellphone, kundi i-pain ang ila tion sa Dios kag sa ila mga palangga sa kabuhi.
Suno sa pari, magaabot ang tion nga ang tanan mapatay.
“One day, all of us here will also die, and sometimes the time we’ve spent on things doesn’t have as much meaning as the time we spend with God,” kabahin sang iya sermon. “The quality time we give to God, to our brothers and sisters, to our husbands, wives, children, and family— that time is the best spent.”
Samtang nagapadayon siya sa pagpangamuyo kag pagpangayo sang pagpakamaayo sang Dios para sa mga tumuluo, hinali nga natumba ang daku nga krus.
Nag-abot ang mga first responder sa lugar, apang ginpahayag sang mga opisyal nga gin-deklarar nga patay si Molinari sa amo man nga adlaw.
Kabahin si Father Sánchez sang Congregation of the Most Holy Redeemer, isa ka Katoliko nga relihiyoso nga organisasyon nga gintukod sang 1732 kag may presensya sa 80 ka pungsod lakip na diri sa Iloilo.
Nagserbisyo siya sa idalom sang Archdiocese of Guayaquil.
Tubtob sa karon, wala pa mahibaluan kon ano ang kabangdanan sang pagkahulog sang mabug-at nga krus halin sa pader.
“We announce that our beloved Father Patricio Alfredo Sánchez Molinari, who served as parish priest of the Perpetual Help church in the Central Vicariate, has departed to the Father’s House to enjoy His presence and His glory,” kabahin sang official statement sang Simbahan.#
