Sigurado na nga may medalya nga dal-on pauli si Aira Villegas matapos nga nag-abanse na ini sa semifinals sang women’s 50-kg sa boxing sa Paris Olympics 2024.
Ginlutos sang Pinay fighter ang hometown favorite nga si Wassila Lkhadiri via split decision sa quarterfinals, 29-28, 29-28, 27-30, 28-29, 29-28, pasado ‘las tres sa kaagahon oras sa Pilipinas.
May yara sang (at least) bronze medal para sa Pinay boxer kag buhi pa ang paglaum nga mahimo ini nga gold medal.
Antes nakatungtong diri sa quarterfinals, ginlutos sang Olympic debutant si Yasmine Mouttaki sang Morocco sa Round of 32 kag Roumaysa Boualam sang Algeria sa Round of 16.
Ang kadalag-an ni Villegas ang naghatag sang paglaum sa boxing team matapos ang mapait nga kalutusan sang Tokyo Olympics silver medalist nga si Carlo Paalam kagab-i batok kay Charlie Senior sang Australia.
Daog ang Australian fighter via split decision sa men’s boxing 57kg quarterfinals sa North Paris Arena kun sa diin tatlo sa lima ka judges ang nagpabor sa iya samtang duha naman ang nagpabor sa Pinoy fighter.
