Napaslawan ang Filipino boxer nga si Nesthy Petecio nga maka-abante pa sa gold medal match sang women’s 57kg sa boxing sa Paris Olympics matapos ginlutos ini sang 20-anyos nga Polish fighter sa semifinals.
Daku nga upset ang nahimo sang Olympic debutant nga si Julia Szeremeta batok sa 32-anyos nga pambato sang Pilipinas nga silver medalist anay sa Tokyo Games 2020.
Apisar pa nga matinlo nga 10 ang nakuha ni Petecio sa lima ka judges sa imbukada nga round, nakabawi ang mas bataon kag mas mataas nga boksidor sa ikaduha kag ikatatlo nga round via split decision, 4-1.
Magapauli gihapon si Petecio dala ang bronze medal para sa pungsod pareho man sa nabulsa sang Pinay boxer nga si Aira Villegas nga nalutos man sa semifinals kahapon sang kaagahon.
Si Petecio amo na ang katapusan nga boksidor sa Paris Games matapos nga temprano nga napierde sanday Eumir Marcial, Hergie Bacyadan, kag Carlo Paalam.
Antes sa semifinals, impresibo ang record ni Petecio sang ginlutos sini si Jaismine Lamboria sang India sa round-of-32, ginpahipos ang French fans sa North Paris Arena sang ginlutos man ang home bet nga si Amina Zidani sa round-of-16, kag ginpasagunsunan sang isa ka pa gid ka kadalag-an batok kay Xu Zichun sang China sa quarterfinals.
