Ginpadayon pa ang Estados Unidos sang Amerika ang paghari sini sa men’s basketball sa Olympiada matapos nabulsa na naman ang gold medal sa Paris paagi sa paglutos sa NBA Rookie of the Year nga si Victor Wembanyama kag sa host nation nga France sa finals, 98-87.
Ini na ang ikalima nga sunod-sunod nga Olympic title para sa men’s basketball team sang US kag ika-17 sa bug-os nga Olympic history sang pungsod.
Nagpanguna si Stephen Curry sa team nga may 24 points kag 5 assists; may 14 points, 9 assists kag 6 rebounds si LeBron James; samtang may 15 points, 4 rebounds, kag 4 assists si Kevin Durant.
Ini ang rematch sang duha ka pungsod sa natabo sa Tokyo 2020 kun sa diin nakuha man sang US ang Olympic title sang ginlutos sini ang France, 87-82, sa final match.
Talalupangdon ini nga tuig sa Olympiada bangud ini na ang posible katapusan nga Summer Games appearance sang basketball legends kaangay kanday James kag Durant bangud man sa ila edad.
“You just simply marvel,” pahayag ni James sa iya NBA rival nga si Curry. “Having him on your side, you just try to get stops and figure out other ways on the other end but keep finding him, keep getting him the ball.”
Sa iya late-game heroics, nag-react naman ang Warriors superstar: “I was just trying to settle us down. All we wanted to do was get a good shot. It had been a while since we had a good possession… (Finally) the momentum was on our side. At that point, your mind goes blank. You don’t really care about setting or the scenario or anything. It’s just a shot.”
Ini na ang ikaapat nga Olympic gold ni Durant, ikatatlo ni James, kag bisan isa na ka four-time NBA champion si Steph, ini pa lang ang iya una nga gold medal sa Summer Games bangud ini man ang iya una nga Olympic appearance.
“There’s a lot of relief,” dugang ni Curry. “It wasn’t easy but, damn, I’m excited, man. This is everything that I wanted it to be and more, so I’m excited.”
Nakuha naman sang Serbia ang bronze medal matapos ang 93-83 victory batok sa World Cup champions nga Germany.
Ang three-time NBA Most Valuable Player nga si Nikola Jokic ang naghimo sang triple double nga 19 points, 12 rebounds kag 11 assists para pangunahan ang pungsod. Antes ang bronze medal match, ginlutos sila sang US sa semis, 95-91.
