Gin-anunsyo sang Sugar Regulatory Administration (SRA) nga nagsugod na ini sang pag-load para sa shipment sang 25,300 metric tons (MT) sang raw sugar agud nga makumpleto ang sugar allocation quota sa United States base sa nakasaad sa Sugar Order (SO) 3.
Ang manual loading sang sugar supply halin sa Negros Occidental ang nagsugod sang nagligad nga Sabado kun sa diin 1,500 MT ang iga-load adlaw-adlaw sa sulod sang 15 ka adlaw sa cargo vessel nga yara sa Bredco Port sa amo nga probinsya.
Kun maubos na ang pagkarga, isa ka bulan antes makalab-ot ang cargo sa Estados Unidos sang Amerika.
Suno kay SRA Administrator Pablo Luis Azcona, ini nga lihok amo ang magabalanse sa supply sang raw sugar sa pungsod kun mag-umpisa na ang milling sa Septyembre.
Base sa record sang SRA, yara sa 30 sugar traders ang nagsabat sa panawagan sang administrasyon sang nagligad nga semana nga magbakal sang domestic sugar para ma-stabilize ang farmgate prices.
Bilang kabaylo dira, ang traders ang mahimo maka import kag export kun kinahanglan.
Ginabakal nila ang raw sugar sa average price nga P2,700 per bag kag ginabaligya ini sa US sa export price nga P1,800 per bag.
Ini ang una nga export sang Pilipinas sang raw sugar subong nga tuig agud maka-partisipar sa masunod pa nga import programs.
