Parking spaces para sa mga motorista, wala naistoryahan sang maayo; hugot nga pagdumili sa pag-park sa mga bike lanes, natalana nga ipatuman

Iloilo City – Wala naistoryahan sa session sang Iloilo City Council kun sa diin ipahamtang ang nga parking spaces para sa mga private vehicles.

Ini matapos nga gingamit sang mga private vehicle owners nga parking lot ang mga bike lanes sa syudad.

Diri na kag gindesisyunan sang Committee on Transportation nga pataasan ang multa sa mga salakyan nga naga-park sa bike lane sa P5,000, mas mataas kun ipaangid sa P2,000 nga multa.

Sa interview sang Bombo Radyo kay Iloilo City Councilor Sedfrey Cabaluna, chairman sang komitiba, iya ginpahayag nga nagakabalaka ini sa mga salakyan nga nagabalabag sa mga bike lanes nga para kuntani sa mga naga-bike lang.

Suno kay Cabaluna, agud panindugan ang pagkilala sa Iloilo City nga bike-friendly city, kinahanglan nga ipatuman ang ordinansa agud mangin disiplinado ang mga motorista.

Nahibaluan nga ginpasidunggan ang Iloilo City sang back-to-back gold sa Mobility Awards kag Bike Lane Awards sang 2021 kag ginkilala man bilang bike-friendly city kag Bike Capital of the Philippines.

Kaangot diri, ginpahayag sang natungdan nga kaangay sang mga iban nga salakyan, kinahanglan man nga hatagan sang igtalupangod ang mga siklista sa syudad bilang respeto sang shared space sa kada isa.