Hugot ang pagpati ni Armed Forces of the Philippines (AFP) Southern Luzon Command chief Lieutenant General Antonio Parlade Jr. nga pulitika ang rason kun ngaa ginapahalin siya bilang spokesperson sang National Task Force to End Local Communist Armed Conflict (NTF-ELCAC).
Ini ang kasunod sang pagrekomenda sang Senado nga pahalinon si Parlade sa anti-insurgency task force sang Duterte administration.
Magluwas diri, nagpaggwa man sang amended committee report sang imbestigasyon ang defense panel sang Senado sa gina-alegar pagpangred tag sang military officials sa mga celebrities kag mga sibilyan.
Lakip sa gin-amyendar sa nasambit nga report amo ang pagpahalin kay Parlade bilang NTF-ELCAC nga nagalapas sa Article 16, Section 5 sang Constitution.
Nasaad sa amo nga layi nga nagakadapat wala sang active nga myembro sang AFP ang nagapakigbahin sa sibilyan nga posisyon sang gobyerno.
Sa exclusive interview sang Bombo Radyo kay Parlade, kag amo man ang spokesperson NTF-ELCAC, iya ginpahayag nga wala sang kamatuoran nga nagapangred tag siya bangud ginaobra lang niya ang iya trabaho nga pagtumod sa mga myembro sang Communist Party of the Philippines – New People’s Army (CPP-NPA).
Lakip sa mga ginpaggwa nila nga pangalan nga ginapahayag myembro sang rebelde nga grupo suno kay Parlade, amo ang naghalin mismo sa mga cadre sang CPP-NPA.
Suno kay Parlade, ginaobra lang niya sang insakto ang iya trabaho sa diin luyag niya nga balabagan ang propaganda kag insurhensya nga nagakatabo sa pungsod.
Nangin madinalag-on man suno sa iya ang pila ka mga proyekto sang NTF-ELCAC rason nga luyag ini nga gub-on sang mga senador nga myembro sang oposisyon.
Bangud diri suno sa natungdan, nahangpan man niya nga may dako nga rolyo ang pulitika sa nagakatabo nga pagtum-ok sa iya agud pahalinon sa Duterte administration.
Nahibaluan nga ang chairman sang NTF-ELCAC amo si Presidente Rodrigo Duterte.
